2Cor 10 | MED | STEP | Na Pol ndi, enim ik ronduⱡ ti kundᵾp nᵾnt. Na enim kᵾn moⱡᵾp kᵾn, wote nanim nga orunga mep mana or ei mel, enim kundᵾp nᵾnt. Wote na enim kᵾn, muⱡi nᵾmbᵾⱡimp ei nga, enim ronduⱡ ngump nunt. Ei nga, enim Kraist nga uⱡ kun kai mbᵾ, raka raka nᵾk etᵾk, elim nga numan orunga mepa mana omba etᵾm ei mel enim ronduⱡ ngump nᵾnt.

2 Corinthians 10

Pol Ndi, Nombuⱡa Rung Wu Mbᵾ Nga Kongun Ronduⱡ Ngurum

1 Na Pol ndi, enim ik ronduⱡ ti kundᵾp nᵾnt. Na enim kᵾn moⱡᵾp kᵾn, wote nanim nga orunga mep mana or ei mel, enim kundᵾp nᵾnt. Wote na enim kᵾn, muⱡi nᵾmbᵾⱡimp ei nga, enim ronduⱡ ngump nunt. Ei nga, enim Kraist nga uⱡ kun kai mbᵾ, raka raka nᵾk etᵾk, elim nga numan orunga mepa mana omba etᵾm ei mel enim ronduⱡ ngump nᵾnt. 2 Na ndi, enim kundᵾp ronduⱡ ngump nᵾnt. Wote, na int enim kᵾn unt ndam, enim ndi, na kᵾn ik ronduⱡ mundᵾk, ni nᵾnᵾi mon! Na punt ei, wamp namin mat ndi, nᵾk mel ik i mbᵾ, ya mᵾi kona ila ik mat nᵾng ndam, na nanim ronduⱡ mbi nᵾmp punt. 3 Uⱡ ei kupa, tᵾn ya mᵾi kona ila pep mormun ni mel, ku pep mormun. Wote, ya mᵾi kona ila wamp el rok uⱡ kit mbᵾ etmin uⱡ ni mel, tᵾn iti natᵾp mormun. 4 Tᵾn nga el rᵾmin mel kat ambᵾrmᵾn kᵾⱡ, ya mᵾi kona ila mel kat mon. Wote, tᵾn nga el itmin mel kᵾⱡ, Got nga el ronduⱡ kᵾⱡ ndi, kapⱡa el puⱡa wamp mbᵾ kᵾn, el etpᵾn ropᵾn mana ndᵾmin. Wote, el puⱡa wamp mbᵾ nga ronduⱡ mbᵾ, ropa mana ndumba ku. 5 Ei nga, Got nga pilpa kungᵾndi kandᵾk ting etmin wamp mbᵾ, uⱡ kit mbᵾ ndi, imp morum ei kᵾn, kandpᵾn el rormᵾn. Uⱡ kit etmin wamp mbᵾ kandpᵾn, imp moⱡmina kᵾn, Kraist nga nombuⱡa mam kai mbila pep rormin. 6 Tᵾn akup tᵾpᵾn kun etpᵾn kᵾn enim nga nokundᵾnmᵾn. Wote enim ndi, tᵾn nga ik kᵾⱡ pilik pep rong ndam, wote tᵾn ndi, ik tᵾk roi ndung wamp mbᵾ, kandpᵾn etpᵾn kit mundmin.

7 Enim ndi, kanmin ei mel mbᵾ pora, ekit orunga mel tetᵾm nᵾk kanmin. Wote, wamp nam ti ndi, elim Kraist nga wamp ti mor nimba pᵾtᵾm ti, moⱡum ndam, elim ndi, el elim nga orunga mana ndupa pilangga. Nambuⱡ emel, tᵾn Kraist nga wamp mormun nimbun pilpᵾn mormun ei mel ku. 8 Got nga ronduⱡ, tᵾn ngorum ila kongun etmin. Ei nga, tᵾn ndi, enim nimbun kit mundi namᵾndᵾrmᵾn mon! Enim nga mondpa pili orunga, etpᵾn ronduⱡ mundᵾp nᵾtmᵾn. Tᵾn nga kongun etmin ronduⱡ uⱡ ei nga, na ndi, paka rop nint ndam, wote na pipil kuⱡi nᵾⱡimp. 9 Na nga mon rop enim ngur ei ndi, enim nimp mundmong indi nᵾndᵾt mon! 10 Wote, wamp mat ndi, nᵾk mel, “Pol mon ropa ngurum uⱡ ei, ik ronduⱡ mbun iti kat, ropa ngurum nᵾk pᵾtmᵾn. Wote elim oⱡnga, kandᵾrmᵾn ei kᵾn, Pol nga ik nᵾtᵾm ik ei nga, ronduⱡ ti mon. Nᵾk pilik, ik wei nᵾmᵾ ti nᵾk pᵾtmᵾn,” nᵾtᵾng. 11 Wote, wamp mat ndi, ik pilik kandᵾk, kun iti natᵾk kᵾn nᵾtmin. Tᵾn ruⱡ etᵾp moⱡpᵾn kᵾn, tᵾn nga mon rormᵾn ei mel, pep ropᵾn itmin ei ka!

12 Wamp mat ndi, en enim nga orunga mbi paka rok nᵾtmin ik ni mel, tᵾn ik i etpᵾn ni nanmᵾn mon. Wamp mbᵾ nga uⱡ etmin mbᵾ kᵾn, wote tᵾn nga uⱡ etmin mbᵾ kᵾn, kᵾmp tᵾpᵾn ni nᵾnmᵾn mon! Wamp ti nga etᵾm uⱡ kᵾⱡ, wamp ti ndi, kᵾmp tᵾtᵾm. Wote wamp ti nga etᵾm uⱡ kᵾⱡ, wamp ti ndi, kᵾmp tᵾtᵾm. Uⱡ i etmin ei ndi, wamp mbᵾ nga pilpa kungᵾndi ei, kapⱡa mon. 13 Wote Got ndi, tᵾn nga to ropa ngurum uⱡ ei, tᵾpᵾn mana ndupᵾn kᵾn, tᵾn nga numan orunga, paka rop mepᵾn, oⱡa pi napᵾrmin. Got ndi, tᵾn nga to ropa ngurum to ila mint, pep ropᵾn etpᵾn, enim kᵾn onmᵾn. 14 Enim Korin wamp mbᵾ, enim Got ndi, tᵾn kongun itᵾmᵾn nimba to rurum kona ei nga, rukᵾr orunga mormin. Ei nga, Got ndi, tᵾn to ropa, Kraist nga Rᵾnang Ik Kai enim kᵾndᵾp nᵾmᵾn nitim kona ei, wak rui nᵾrmᵾn mon! 15 Got ndi, tᵾn kᵾn kongun ngurum uⱡ ei, rop rangundpᵾn kᵾn, wamp mat nga kongun eng uⱡ mbila, tᵾn nga mbi paka ropᵾn ni nanmun mon! Got ndi, tᵾn nga kongun ngurum ei, kun etᵾp mepᵾn pamina kᵾn, wote tᵾn pᵾtmin ni, enim nga mondpa pili uⱡ ei ronduⱡ mba. Wote, tᵾn nga kongun ei, etpᵾn mep pamina mba ou itangga! 16 Uⱡ ei nga, tᵾn ndi, Rᵾnang Ik Kai kᵾⱡ, mepᵾn mbun, enim nga kona ei nga mbuldung orunga kona mat tetᵾm mbila, mepᵾn mbin. Wote, wamp mat nga kongun etᵾk tetmin kona mbila, tᵾn nga etmin nimbun mbi paka ropᵾn ni nᵾnmin mon! 17 Buk Wingti Ik kᵾⱡ, nimba mel, “Wote, wamp nam ti, ambuⱡpa paⱡim uⱡ ei, Nuim ei kᵾn etᵾm mba,” nᵾtᵾm. 18 Tᵾn pᵾtmun ni ka! Wamp nam ti, elim nga mbi paka ropa moⱡum wamp ei, Nuim ei nga kuimp keta ila mbi ti, muⱡi nambᵾⱡᵾmba mon! Wote, wamp nam ti, Nuim ei ndi, mbi paka rom wamp ei, mint mbi moⱡmba.